هل تعرف ماهوة أعظم ألم في الحياة ؟؟!!

جربولسه بتعاني من الحب الأول.. مش قادر تنساه.. وبتلاقي صعوبة في إنك تتخطى التجربة.. يبقى تقرا اللي جاي..

طبيعى إنك تكون موجوع..

حط في دماغك إن كل انفصال بيكون بمثابة كارثة كونية للي بيمر بيه، لكن الانفصال بيكون شيء طبيعي وبيحصل لكل الناس.. زي ما كل طفل بيقع على ركبته ويجرحها.. زي ما كل الناس اللي بتحب أو حبت بتتعرض لتجربة الانفصال المؤلمة.

الألم له مكانه في حياتنا، ولو كنت فاكر إنك اتعلمت حاجات كتير من علاقتك السابقة، أكيد لسه فيه حاجات كتير هتتعلمها ومشاعر أكتر هتجربها مع حد رائع بيدور عليك زي ما إنت بتدور عليه. حاول تتقبل اللي حصل وخلي عندك إيمان بإن اللي جاي.. هيكون أحسن.

ابعد عن الأطلال

إنت محتاج وقت عشان تتخطى التجربة وترجع لقواعدك سالما. مش لازم تعذب نفسك باستمرار وتروح الأماكن اللي كنتم بتروحوها وتقعد تعيط على الأطلال.

اكتشف أماكن جديدة عمرك ما روحتها مع حبيبك اللي انفصلت عنه وفكر في أفكار جديدة لهوايات جديدة. إنت حتى ممكن تسافر عشان تجدد نشاطك وتنفض الملل والروتين عن أكتافك. باختصار.. خد فترة نقاهة.

براحتك خااالص..
لما بتتفرج على الأفلام العربي -أو الأجنبي مش فارقة- الأبطال بيمروا بلحظات الانفصال القاسية في أقل من 5 دقايق وبعدين بتلاقيهم دخلوا في علاقة حب جديدة والحياة بتبقى Peace جدا بعدها. لكن في الحقيقة الموضوع بيحتاج أسابيع -إذا ماكانش شهور- عشان تتغلب على تداعيات انتهاء العلاقة. وكل ما كانت فترة العلاقة أطول كل ما بتحتاج وقت أكتر عشان تتغلب عليها (أظن شيء طبيعي!).

ما تستعجلش أو تدي ودنك لأصحابك اللي عاوزين يخرجوك من "المود" في أسرع وقت ممكن. الأصحاب الحقيقيين هيتفهموا إنك محتاج وقت عشان تخرج من التجربة. ماتتوقعش كمان إن إحساسك بالألم هيختفي كده فجأة، كل اللي أقدر أقوله لك إنه هيتلاشى بالراحة وبالتدريج.

واحد قهوة مظبوط
لما بتكون لسه خارج من تجربة عاطفية بتكون في دوامة من المشاعر المتناقضة اللي بتملا جسمك وبتحسسك بتوتر زايد عن الطبيعي. أعتقد إن آخر حاجة تكون عاوزها هي إنك تزود التوتر ده عن طريق المنبهات (الشاي والقهوة وكده يعني).

حاول تقلل الكافيين (اسم حركي للمنبهات برضه) بقدر الإمكان في أول كام أسبوع عشان تخلي جسمك في حالة اتزان، وهتلاقي إن الحياة أفضل بكتير لما جسمك مايكونش في حالة النهم لحرق السكر اللي بيسببه الكافايين